تحدثت الفنانة يسرا عن علاقتها بالفنان أحمد زكي، مشيرةً إلى إنه كان يشبهها بالشمس، كما تحدثت عن فترة مرضها وإصابتها بـ كورونا.
وقالت يسرا خلال تصريحات إذاعية: فيلم ضحك ولعب وجد وحب هو الفيلم الوحيد اللي أنتجته، ومأنتجتش بعده ومش هنتج تاني، مش عشان خسرت بالعكس هو كسب جدا، بس عشان أنا مليش في الحاجات دي.
وتابعت يسرا متحدثةً عن الفنان عمرو دياب، قائلةً: عمرو راجل أنا مشوفتش في ذكائه، وهو من أطيب وأنقى الناس وجدع، وهو من النوع اللي ميحبش يحرق نفسه في حاجات كتير، وهو شخص بيحب شغله جدا.
وأضافت يسرا: مفيش في جمال عمرو ونشاطه وعمره فياريت يرجع التمثيل أنا أتمنى، وأحمد زكي أخويا وصاحبي وكان دايما بيسميني الشمس، وفي عز الألم عمره ما كان يظهر ده، وكلنا لينا فيه لأنه صاحبنا وأخونا، وأنا فاكرة أول ما سمعنا إنه تعب، ريسيبشن المستشفى كان مليان بكل ممثلين مصر بدون استثناء.
ثم تطرقت يسرا للحديث عن حياتها الشخصية، حيث قالت: أنا أكيد لازم يكون عندي عُقد بس أنا بعديها، وساعات في لحظات بفتكر حاجات معينة عن والدي وبتضايقني بس لما بفتكر إنه مات وأنا كمان هموت بقول خلاص، وأنا أخدت من مامتي كل حاجة حتى عياها، وأنا لما كنت عيانة عندي كورونا وكانت حالتي خطر جدا، كم الدعاء اللي جالي وكم الناس اللي دعولي ودبحولي، ده حب بلا مقابل.
